Жамоатчи фаолларимиздан бири –  Бўстонлиқ туманидаги “Бўстонлиқ овози” – “Бостандык даусы” газетаси бош мухаррири Абдусолиҳ Қулбоев қўнғироқ  қилиб,   туманнинг Айдарали қишлоғида яшовчи 103 ёшлик   Халифа ая Қалибекова хонадонида бўлганлигини айтиб,   онахоннинг илтимосини етказди. Оёқларига бироз  шикаст етиб, юришдан қийналаётган Халифа ая ногиронлик аравачасига мухтож эканликларини билдириб, ёрдам сўрабдилар. Фондимизнинг иқтисодий имкониятлари чамаликкина. Фурсатни қўлдан бой бермай ҳомийлар излаб топишга киришдим. Интернет саҳифаларидан бевосита ногиронлик аравачалари савдо-сотиғи,  ишлаб чиқариши билан шуғулланадиган  ташкилотларга кўз югуртириб, таваккал бир рақамни тердим.   Мурожаатимни диққат билан эшитган “Atom technoloog” савдо ташкилоти масъул ходими Йўлдошали Алимов  имкон қадар ёрдам  кўрсатишни ваъда қилди.

Шундай қутлуғ кунларда  саховатпеша инсонларимиз имкон қадар хайру эхсон қилишга киришган.  Йўлдошали ҳам  ўз сўзида турди. Куни кеча онахон учун битта ногиронлик аравачасини хайрия тариқасида  берди. Аравачани бизга етказган жамоа аъзоси Шохрур Маҳамаджонов эса бир дона эшитиш қурилмасини хайрия қилди. Бу қимматли совға саломларни ўз эгаларига етказишга шошилдик.  Кеча онахоннинг уйида бўлдик. Уларнинг  қувончини чеки йўқ эди. Аяни аравачага ўтқазар эканмиз,  ҳомийларимизни, бизни узундан узоқ дуо қилдилар.   Биз воситачи эдик, халос.

Чимбойлиқ қишлоғида истиқомат қилувчи меҳнат фахрийси Усмон ота Нортўраевнинг эшитиш қурилмасига эҳтиёжи борлигидан хабардор эдим. Шу куни Абдусолиҳ Қулбоев ҳамроҳлигида отахоннинг уйига йўл олдик. Энг мухими, ҳомийларимизнинг совғасини  ўз эгаларига етказдик.

Ибрат олса арзийдиган саховатпеша инсонларимиз омон бўлсин.

Халқаро Амир Темур хайрия жамоат фонди ахборот хизмати