БУЮК БОБУРНИ ЁД ЭТИБ
Жорий йилнинг 14 февраль куни Андижон шаҳрида шоҳ ва шоир Захириддин Муҳаммад Бобур таваллудининг 540 йиллигига бағишланган адабий-бадиий, маънавий-маърифий тадбир бўлиб ўтди. Халқаро Амир Темур хайрия жамоат фонди вилоят бўлими ва Андижон қишлоқ хўжалик институти ҳамкорлигида ўтказилган ушбу тадбирда ёзувчилар, олимлар, профессор-қитувчилар, талаба ёшлар, жамоатчилик вакиллари иштирок этдилар.
Андижон қишлоқ хўжалик институти проректори Абдусалом Мақсуталиев, Халқаро Амир Темур хайрия жамоат фонди вилоят бўлими раҳбари, ёзувчи Ҳабиб Сиддиқ, доцент Расулжон Юсуповлар Ўзбекистон Республикаси президенти Ш. Мирзиёевнинг 2023 йил 25 январдаги “Буюк шоир ва олим, машҳур давлат арбоби Захириддин Муҳаммад Бобур таваллудининг 540 йиллигини кенг нишонлаш тўғрисида”ги қарори мазмун ва моҳияти, ундан келиб чиқадиган вазифалар, буюк бобокалонимиз меросининг баркамол авлодни тарбиялашдаги ўрни, китобхонлик маданияти хусусида фикрлари билан ўртоқлашдилар.
Тадбир давомида иқтидорли талаба ёшлар томонидан тайёрланиб, намойиш этилган саҳна кўринишлари ҳамда Бобур ғазаллари ва рубоийларидан куйланган қўшиқлар томошабинлар дилларини хушнуд қилди.
Ёшларнинг фаол иштироки билан ўтган мароқли тадбир адабиёт байрами, шеърият байрамига айланиб кетди ва иштирокчиларда катта таасссурот қолдирди.
Халқаро Амир Темур хайрия жамоат фонди ахборот хизмати
