СОҲИБҚИРОН АМИР ТЕМУР – КЎҲНА НАСАФ БУНЁДКОРИ
Жорий ойнинг 20 январь куни Қарши шаҳрида Халқаро »Олтин мерос” хайрия жамоат фонди Қашқадарё вилояти муассасасида Соҳибқирон Амир Темур таваллудининг 687 йиллиги олдидан Халқаро Амир Темур жамоат фонди ва Халаро “Олтин мерос” хайрия жамоат фондининг вилоят бўлимлари ҳамкорлигида “Соҳибқирон Амир Темур – кўҳна Насаф бунёдкори” мавзусида давра суҳбати ташкил этилди.
Бир гуруҳ ёшлар иштирокида ўтган тадбирда Ёзувчилар уюшмаси вилоят бўлими ва Халқаро Амир Темур жамоат фонди вилоят бўлими раҳбари Ғулом Абдиев кўҳна Насафда Соҳибқирон Амир Темур томонидан кўплаб бунёдкорлик ишлари амалга оширилганлигини алоҳида таъкидлаб, буюк саркарданинг юрт ободончилиги йўлида қилган ишлари ҳали тўлиғича ўрганилмаганлигини айтиб ўтди. Шунингдек, у Амир Темур тарихини чуқур ўрганиш – ёшларни юртга садоқат руҳида тарбиялашда ва уларда ватанпарварлик туйғуларини шакллантиришда муҳим аҳамиятга эга эканлиги хусусида гапирди.
Шундан сўнг “Олтин мерос” хайрия жамоат фонди вилоят бўлими раҳбари, адиба Шарофат Ашурова юртимизда яшаб ўтган улуғ аждодларимиз ҳаётини ўрганиш давр тақозоси эканлигини, юртимиз тарихини англаш келажак авлод тарбиясида муҳим аҳамият касб этишини таъкидлади.
Иштирокчилар учун суҳбат қизиқарли маълумотларга бой бўлди.
Халқаро Амир Темур хайрия жамоат фонди ахборот хизмати
