Халқаро Амир Темур Хайрия жамоат фонди Фарғона вилояти бўлими томонидан олий ўқув юртлари ва вилоят халқ таълими бошқармаси билан ҳамкорликда талабалар ва ўқувчи ёшлар ўртасида «Миллатнинг дардларига дармон бўлинглар» мавзусида иншо, баён, ижодий ишлар тонлови ўтказилмоқда.
Фонд фаоллари билан ҳамкорликда Фарғона туманидаги қатор умумтаълим мактабларида мавзуга доир суҳбатлар, учрашувлар ўтказилиб, маърузалар қилинмоқда. Ўқитувчи ва ўқувчиларга китоблар совға тариқасида улашилмоқда.
Жорий йилнинг 26-октабр куни Фарғона шаҳридаги Темурбеклар мактабида ҳам ушбу мавзуда олиб борилаётган ишлар билан танишилиб, мавзу бўйича ўқувчилар билан суҳбатлар ўтказилди, кўрик танловнинг олиб борилишига мутасаддилар жиддий эътибор қаратишди.
Фарғона вилояти бўлими қошидаги «Ирмоқлар» талаба ўқувчи-ёшлар иштирокида кўнгиллилар гуруҳи ташкил этилгач, гуруҳ аъзолари ўзлари истиқомат қилаётган шаҳар, қишлоқлар, маҳаллалар, яшаб ўтган тарихий шахслар ҳақида маълумот тўплашиб, маълумотлар манбасига киритишади ва кенг оммага етказишади. Бу билан ёшларда ўзи яшаб турган жойлар, у ерда яшаган инсонлардан ва шу орқали ўз миллатидан фахрланиш, ғурур ҳисларини тарбиялашга ҳаракат қилиш бош ғоядир.
Иншолар, баёнлар кўрик танлов ғолибларини Тошкент шаҳрига – Темурийлар тарихи давлат музейига юбориш режалаштирилмоқда.

Халқаро Амир Темур хайрия жамоат фонди ахборот хизмати