Халқаро Амир Темур хайрия жамоат фонди раиси, Ўзбекистон халқ ёзувчиси, профессор Муҳаммад Али таваллудининг 80 йиллиги Республика миқёсида йил бошидан буён тантанали нишонланиб келинаётгани барчамизга маълум. Ушбу қутлуғ кун муносабати билан Ўзбекистон Миллий Академик драма театрида ҳам ижодий кеча уюштирилиб, эл суйган серқирра ижодкорни шогирдлари ва барча яқинлари қизғин табриклашди. Кечада ўзларининг шўх қўшиқлари билан иштирок этган санъаткорлар даврага ўзгача кўтаринкилик бағишладилар. Шунингдек, кеча қаҳрамонини қутлаш мақсадида келган меҳмонлар ўз эсдалик совғаларини топширишди. Кечада устоз адибнинг ҳаёт ва ижод йўли ҳақида ҳам сўз бориб, босиб ўтган машаққатли даврлари тингловчиларга сўзлаб берилди.